На 3 јуни 2026 година, во организација на Комората на овластени архитекти и овластени инженери (КОАИ), преку Одделението на градежни инженери, успешно се одржа хибридно стручно предавање посветено на примената на Еврокодовите при проектирање и анализа на сложени челични и спрегнати конструкции.

Предавач на настанот беше проф. д-р Денис Поповски, дипл. град. инж., кој преку практични примери и реални искуства од инженерската пракса ги презентираше современите пристапи за проектирање и анализа на индустриски хали, повеќекатни челични индустриски објекти, спрегнати конструкции и армирано-бетонски темелни системи.

Во рамки на предавањето беа обработени повеќе значајни теми поврзани со анализата на постојани и корисни товари, товар од снег, крански греди, модуларни рамки, спрегови, просторни конструкции, врски и детали, како и препораки за избор на конструктивни системи и избегнување на конструктивни нерегуларности согласно барањата на Еврокодовите.

Настанот предизвика голем интерес кај членовите на Комората, а активната дискусија и размената на професионални искуства уште еднаш ја потврдија потребата од континуирана стручна едукација и усовршување на инженерската професија.

КОАИ останува посветена на организирање на стручни настани кои придонесуваат кон унапредување на знаењето, професионалниот развој на инженерите и примената на највисоките европски стандарди во инженерската практика.