Имаме чест да Ве поканиме на предавање кое ќе го одржи проф. д-р Владимир Ладински, насловено „Комплексноста и контрадикторноста на градежништвото во 2020-те“.
Пандемијата ни даде поинакво видување на светот и ги нагласи противречностите помеѓу јавното добро и личниот интерест, вклучително со градежништвото, изградената и животната средина. Укажувајќи на комплексноста и контрадикторноста на односите, презентацијата се обидува да ги посочи можностите и предизвиците со кои се соочува градежништвото како индустрија и сродните професии во Велика Британија по Пандемијата и Брегзит. Зелена транзиција, демографски промени, недостапност до станови, приватизација, дерегулација, депрофесионализација, вреднување на услугите, јавни набавки, недостаток на работна сила се дел од клучните предизвици коишто ќе бидат разгледани вклучително со можностите коишто произлегуваат од нив. При тоа ќе се посочат и обидите преку иновативни пристапи како да се надминат дел од разгледаните предизвици, а кои можат да послужат како инспирација и во нашата средина.
Избраните теми ќе можат да ги информираат архитектите, инженерите и урбанистите за дел од состојбите во градежништвото надвор од земјата, а коишто се манифестација на глобалните трендови.
Проф. д-р. Владимир Ладински, е регистриран архитект во Велика Британија со долгогодишно работно искуство во струката како во приватниот така и во јавниот сектор во доменот на образовни, културни, деловни, и специјализирани станбени објекти вклучително со адаптации и доградби на заштитени објекти од градителското наследство. Покрај стручната тој е вклучен и во наставно-научна дејност во доменот на одржливото проектирање. Проекти на коишто работел се добитници на повеќе награди и признанија во Велика Британија.
