Четвртата Годишна Средба на Архитекти и Архитекти Урбанисти, насловена „Архитектурата утре“, се одржа во историскиот контекст на Битола, во просториите на Офицерскиот Дом. Овој значаен настан собра архитекти и урбанисти од регионот и Европа, кои во два дена дискутираа за иднината на архитектурата, како и за предизвиците што ги носат новите технологии и урбанистички потреби.
Повеќе: IV Годишна Средба на Архитекти и Архитекти Урбанисти: Архитектурата утре
Во рамки на Четвртата Годишна средба на архитекти и архитекти урбанисти, учесниците ќе имаат можност да присуствуваат на Дебатното кино Контра кадар. На овој посебен настан ќе биде прикажан документарниот филм „Начинот на Чипан“, кој отвора дискусија за архитектурата на Борис Чипан, еден од најзначајните македонски архитекти и водечка фигура на модернистичката архитектура во Македонија и во Охрид.Творештвото на Борис Чипан е обемно и опфаќа проекти од архитектурата, заштитата на културното и архитектонското наследство, како и научно-академската дејност. Филмот „Начинот на Чипан“ ја следи групата млади архитекти од Охрид кои се обидуваат да ја зачуваат избледената модерна архитектура на градот и да оддадат почит на наследството на Чипан.
Овогодинешното XXII Биенале на македонската современа архитектура – БИМАС 2025, кое се одржа во октомври во главниот град Скопје, пристигнува и во Битола, во рамките на Четвртата Годишна средба на архитекти и архитекти урбанисти.
Селекција од идејни и реализирани архитектонски проекти, урбанистички решенија и ентериерни проекти ќе биде изложена во објектот на Офицерскиот дом во Битола за време на настанот.
БИМАС претставува најголема и најзначајна архитектонска манифестација во државата, која обединува многубројни архитекти и урбанисти. Оваа изложба е одлична можност да се претстави македонската архитектура од последните две години пред гостите на средбата – и од земјата и од странство.
